काठमाडौँका इन्टरनेशनल कलेज

राजधानीस्थित ठुला ठुला र करोडौं, अरबौं पूँजी लगानी भएका व्यापारिक संस्था, मल्टिनेशनल कम्पनीहरुले चर्चित राष्ट्रिय दैनिक पत्रिकाहरुमा रंगिन पुरा पृष्ठमा विज्ञापन गर्ने खर्च जुटाएको प्रायः देखिँदैन तर अहिले काठमाडौंस्थित विभिन्न टोल टोलमा वर्षा यामका जुका उम्रिए जस्तै उम्रिएका कलेजहरुले अभिभावकको रगत चुसेर भएपनि यति धन लक्ष्मी थुपारेका छन् कि उनीहरुलाई लाखौं लाख खर्च गरी राष्ट्रिय दैनिक पत्रिकाहरुमा पूरा पृष्ठ विज्ञापन गर्नु पनि सामान्य भइसकेको छ । अहिले टेलिभिजनका विभिन्न कार्यक्रमहरुका यीनै शिक्षाका मन्दिरहरु गर्वका साथ प्रायोजकका रुपमा प्रस्तुत भएको पाइन्छ । मिनेट मिनेटमा टेलिभिजनमा आउने यस्ता कलेजका विज्ञापनहरुमा शिक्षाका नाममा लगानी भएको पैसाको दुरुपयोग भई व्यापारका लागि खर्च भएको प्रष्ट देखिन्छ । जुन कुरा कुनैपनि दृष्टिकोणबाट राम्रो मान्न सकिँदैन । के अभिभावकले आफ्नो रगत र पसिना बगाएर, सकि नसकी आफ्नो सन्तानको उज्ज्वल भविश्यको निम्ति गरेको खर्च यही पत्रिकामा पुरा पृष्ठ विज्ञापन हेर्नका निम्ति हो या टेलिभिजनमा मिनेट मिनेटमा विज्ञापन हेर्न र सुन्नका लागि हो ।यसको जवाफ अभिभावकलाई दिनु पर्ने समय आइसकेको छ ।  

अबको परिस्थितिमा धनी बन्न बिल गेट्सले जस्तो माइक्रोसफ्ट कम्पनी खोल्नुपर्ने अवस्था रहेन । काठमाडौंमा आएर एउटा इन्टरनेशनल कलेज खोलेपछि बिल गेट्सले गरेको दुःख नगरी धनी हुन सकिने भयो । कलेजको नामाकरण गर्नपनि अहिले कुनै ठूलो समस्या रहेन । एउटा कुनै चर्चित विदेशी भवन, फुटवल क्लब, विश्वविद्यालय, शहर, व्यक्ति आदिको नाम राखी त्यसको पछाडि इन्टरनेशनल भन्ने शब्द झुण्डाएपछि नाम जुराउन कुनै ज्यातिषीलाई पनि गुहार्नु पर्ने भएन । त्यसैले होला अहिले काठमाडौँमा नेपाली नाम गरेका कलेज खोज्नु भनेको कुखुरा नखाने बाहुन खोज्नु जस्तो गाह्रो भैसक्यो ।\

शिक्षालाई व्याापारको ठाउँ बनाई लखपति बन्न खोज्ने यस्ता महान शिक्षकलाई अब विद्यार्थीले गुरु भन्दा पनि पाप लाग्ला । कलेजका ठूला र चर्चित शिक्षकहरु अहिले विद्यार्थीलाई कसरी राम्ररी पढाऊँ र विद्यालयलाई कसरी सुधारुँभन्दा पनि दुई चार जना साथीसँग मिली कलेजलाई कसरी फुटाएर एउटा नयाँ कलेज खोली लखपति बन्न पाऊँ भन्ने सोचमा नै बढि तल्लीन देखिन्छन् । यस कुराको पुष्टि नेपालका राजनीतिक दलहरु भन्दा पनि छिटो छिटो फुट्ने यहाँका कलेजहरुले मजैसँग गर्दिएका छन् । कलेजहरुले गरेका यस्ता विकृति रोक्न प्रभावकारी रुपमा अनुगमन गर्ने यहाँ कुनै निकाय देखिँदैन । शिक्षा जस्तो पवित्र शव्दको नाममा खुलेआम ठगी र डकैति गर्ने यस्ता कलेजलाई निरुत्साहित गर्ने खालका कदमहरु चोलेको पाइदैन ।

यस्ता ठग कलेजहरुले दिनको लाखौं रुपैयाँ खर्च गरी अनावश्यक रुपमा टेलिभिजन र पत्र–पत्रिकामा विज्ञापन गर्नुभन्दा गरिव र जेहेन्दार विद्यार्थी, जो पैसाको अभावमा शिक्षाबाट बन्चित हुन पुगेका छन , त्यसता विद्यार्थीलाई छात्रवृति दिने हो भने नेपालबाट पनि आइसटाइनहरु जन्मने थिए । कलेजमा पाँचतारे होटल जस्तो एयर कन्डिसन, स्वीमिङ पुल र विद्याथीलाई चढ्न नदिने लिफ्टमा खर्च गर्नुभन्दा कलेजको शुल्क न्यून गर्ने तर्फ प्रयास भएमा अभिभावकले छोराछोरीहरुलाई पढाउनका लागि आफ्नो घर जग्गा बेच्नुपर्ने थिएन । यी कुराहरु शिक्षित भनौदा कलेज सञ्चालक र शिक्षकहरुको थोत्रो मगजले किन सोच्दैन ?

शैक्षिक सस्थालाई शिक्षाको मन्दिर भनी गर्व गर्ने तर उद्धेश्य चाहीँ केवल नाफा मात्र कमाउने भएको यस्ता कलेजले गर्दा नेपालमा शिक्षा क्षेत्रको निस्वाथर््तामा प्रश्न चिन्ह खडा भएको छ । नत्र भने कुनै पनि शिक्षाको मन्दिरले कोकाकोला र पेप्सीको जस्तो विज्ञापन गर्न जरुरत हुदैनथ्यो, हैन र ? विद्यार्थीको लागि प्रयोग गर्न नदिने लिफ्ट देखाएर होस या विग्रेका कम्प्युटरका अगाडि विद्यार्थीलाई बसाएको तस्बिर खिचेर होस् , कलेजहरु आफ्नो विज्ञापन जोडतोडले गरेको देखिन्छ । बाहिरबाट हेर्दा डिपार्टमेन्ट स्टोर जस्ता देखिने भव्य महल देखाएर विद्यार्थी तान्न पनि कलेजहरु तछाडमछाड गरेको पाइन्छ । के भव्य महल भित्र बिग्रेको लिफ्ट हेरेर शिक्षा आर्जन हुन्छ र ? भरखर एसएलसी पास गरेका विद्यार्थीहरुले यही कुरा नबुझेर यस्तै भव्य विज्ञापन गर्ने र बाहिरबाट टलक्क टल्कने कलेजहरुमा पढ्न लालयीत हुन्छन् र यस्ता निर्दोष विद्यार्थी नै इन्टरनशनल कलेजका आहारा बन्न पुग्छन् ।

हुनतः गणतन्त्र र लोकतन्त्रभन्दा पनि लुटतन्त्र बढी स्थापित भएको हाम्रो देशमा कलेजले विद्यार्थीलाई लुट्नुलाई  अस्वाभाविक मान्न त मिल्दैन । अशिक्षित र अज्ञानी नेताहरुबाट त लुटिए लुटिए अब शिक्षित शिक्षकबाट पनि  नेपाली अभिभावकहरु लुटिदैछन् । यो कुरा त निजी शैक्षिक संस्थाका लगानीकर्ताहरु, सिइओ र डाइरेक्टरको भुँडि हेरेर नै प्रष्ट भैहाल्छ । अहिले निजी शैक्षिक संस्थाहरु अभिभावकको पैसा लुटी धन कमाउने सर्टकर्ट बनेका छन । दर्शकहरु लुट फिल्म हेर्न फिल्म हल नगई काठमाडौँस्थित निजी शैक्षिक संस्थाहरुको वार्षिक शुल्क हेरेको भए राम्रो तरिकाले लुट हेर्न पाउने थिए । यदि लुट २ बन्ने हो भने पक्कैपनि हाकु कालेले बैंक लुट्ने दुःख नगरी एउटा कलेज खोल्ने मास्टर प्ल्यान बनाउने थियो होला किनभने अहिले सबैभन्दा सजिलो र बैधानिक तरिकाले लुट्ने थलो नै निजी शिक्षण  सस्था बनेका छन् ।

पैसा नै कमाउने उद्देश्य हो भने उद्योगधन्दा र कलकारखानामा लगानी गर्नु सबैभन्दा उत्तम होला ।  धनलाई नै प्र्रमुख उद्देश्य राख्ने व्यतिmलाई कृपया शिक्षामा हात नहालिदिनुहुन हार्दिक अनुरोध छ । शिक्षामा लगानी गरी करोडपति बन्ने उद्देश्य राख्ने व्यतिmलाई अझ पनि समाजमा मौलाउन दिइयो भने यस्ता व्यतिmले नेपालको शिक्षालाई ध्वस्त बनाइदिनेछन । त्यसैले अब कलेजले विज्ञापन र तडक भडकमा लगानी गर्नुभन्दा शिक्षाको गुणस्तरमा लगानि गरी विद्यार्थीलाई सुनौलो भविष्यको बाटो देखाउन तल्लीन हुनुपर्दछ ।